Книга, глаголемая "Златоуст".

Аще кото́рый ца́рь или́ кня́зь к ко́ему гра́ду по́йдет, срета́ют его́ ту́ су́щии. И мы́ у́бо та́коже до́лжни есмы́ твори́ти, поне́же Сы́н Бо́жий Единоча́дный и Собезнача́льный с небесе́ схо́дит к сме́ртным челове́ком. Ны́не прии́де во́лею Стра́сти прия́ти на́шего ра́ди спасе́ния. Мы́ же до́лжни есмы́ с чи́стою со́вестию сре́сти и духо́вне прия́ти Его́ святы́х Та́ин причаще́нием. Слы́шите, хотя́щии ны́не приступи́ти ко святе́й и стра́шней Та́йне, и разуме́йте, ка́ко Святы́ни хо́щете причасти́тися, ея́же небе́сныя си́лы трепе́щут, херуви́ми, и серафи́ми, и вся́ а́нгельская во́инства ужаса́ются, вознося́ще духо́вную же́ртву к Бо́гу. Те́х бо образу́юще иере́и, предстоя́т святе́й, и стра́шней, и чу́дней Боже́ственней трапе́зе, на не́йже предлежи́т Те́ло и Кро́вь Го́спода на́шего Иису́са Христа́, ю́же прообразова́ на́м Са́м Госпо́дь и Спа́с на́ш Собо́ю. В сíй бо де́нь возлеже́ Госпо́дь на Ве́чери со обе́ма на́десяте ученико́ма Свои́ма, и прие́м хле́б и благослови́в, и хвалу́ возда́в Бо́гу и Отцу́, преломи́, и дая́ше ученико́м Свои́м, глаго́ля: «приими́те, яди́те, се́ е́сть Те́ло Мое́, ломи́мое за вы́, во оставле́ние грехо́в». Та́ко же и ча́шу прие́м, рече́: «пíйте от нея́ вси́, се́ е́сть Кро́вь Моя́ Но́ваго Заве́та, излива́емая за вы́ и за мно́ги во оставле́ние грехо́в». Разуме́йте у́бо, я́ко не рече́, за еди́ны апо́столы, но и за вся́ ве́рующия в Онь. Воста́в же с Ве́чери, и взе́м ле́нтие, препоя́сася, и умыва́ше ученико́м но́зе Иису́с, ту́ же и преда́телю с ни́ми умы́, да не реку́т последи́, я́ко того́ ра́ди Его́ преда́, зане́ Ве́чери его́ лиши́ и но́ги ему́, я́ко и про́чим, не умы́. О, ве́лие Госпо́дне смире́ние и беззло́бие! Служа́ше бо Госпо́дь рабо́м, и ве́дый, кто́ е́сть предая́й Его́, но не рече́ ему́: «изы́ди во́н, о преда́телю». Сия́ бо Творе́ц вся́ сотвори́, о́браз на́м дая́, смире́ние и беззло́бство име́ти. Егда́ бо Иу́да оты́де призва́ти жидо́в, да и́м Го́спода преда́ст, тогда́ Госпо́дь мно́га пресла́вная уче́ния запове́да апо́столом. Си́це и на́м подоба́ет у́бо по причаще́нии пости́тися и моли́тися: пе́рвее бо е́же да прия́ти бу́дем досто́йни, а последи́ же да не обезче́ствуем. То́ бо ся́ имену́ет безче́стие, е́же на у́трее, и в другíй, или́ в тре́тий де́нь, пе́рвыя па́ки зло́бы име́ти. Яко же бо кто́ нездра́ву утро́бу имы́й, и уго́дну я́дь прии́мет, то́ губи́т все́, и бо́льшу сотвори́т боле́знь. Та́ко и святы́х Та́ин причаще́ние: а́ще недосто́йне кто́ прии́мет, зла́ име́я согреше́ния, или́ за́висть, или́ гне́в, или́ злопомне́ние, или́ блу́д беззако́нный, то го́ршему сподо́бится муче́нию. Подоба́ет у́бо на́м очи́стити у́м и со́весть, и тогда́ приима́ти святы́я и пречи́стыя Та́йны. Аще же скве́рнен кто́, то́й и в пра́здники не́сть досто́ин причасти́тися. Глаго́лет бо апо́стол Па́вел: «я́ко недосто́йне причаща́яйся, в су́д себе́ я́ст и пие́т». Иже кто́ с небреже́нием Та́йны Христо́вы прие́млет, то́й бо́лее в себе́ ме́сто бесо́м дае́т, я́коже и во Иу́ду преда́теля с хле́бом вни́де сатана́. А и́же со́ страхом прие́млют Та́йны Христо́вы, со смире́нием ка́ющеся, таковíи во оставле́ние грехо́в прие́млют себе́. Аще ли кто́ имы́й грехи́ тя́жки: грабле́ния зла́я, или́ блу́д, или́ за́висть, или́ гне́в, и вся́ про́чая зло́бы, а́ще ся́ си́х не оста́нет, и епитимии́ не прии́мет, недосто́ин причасти́тися святы́х Та́ин Христо́вых. Аще же кто́ богобоя́зниво прие́млет, то́й поми́лован бу́дет. Аще ли же двоемы́сленно со зло́бою, то́й со Иу́дою осу́дится. Те́м же, ве́рнии, прии́мем Те́ло и Кро́вь Госпо́дню во оставле́ние грехо́в, на святы́ню души́ и в живо́т ве́чный, да бу́дем апо́столом о́бщницы и с ни́ми она́мо водвори́мся в ра́дости. Да никто́ же ва́с бу́ди зло́бив, я́ко Иу́да: о́н бо со Христо́м вечеря́я, мы́сляше преда́ти Его́, и со апо́столы пребыва́я, к жидо́м клевета́ше. И никто́ же ва́с, бра́тие, без разсмотре́ния Те́ла Христо́ва прие́мли: не про́ст бо е́сть хле́б и вино́, но и́стинное Те́ло и Кро́вь Госпо́дня. Поне́же не мо́жет челове́к сы́ра мя́са я́сти и кро́ви пи́ти, того́ ра́ди Госпо́дь предложи́ Те́ло Свое́ в хле́бе, а Кро́вь Свою́ в вине́. И не во ино́м вине́, но над ни́м же иере́и слу́жбу творя́т и безкро́вную святу́ю Же́ртву к Бо́гу прино́сят. Сего́ ра́ди не мо́жем, бра́тие, негото́ви прия́ти, но любо́вию, а не лицеме́рием лю́бящеся. Кото́рый же ва́с хо́щет прия́ти Те́ло и Кро́вь Госпо́дню, и а́ще и́маши на кого́ гне́в, ше́д, пре́жде смири́ся, пото́м причасти́ся; или́ с ке́м бу́деши свари́лся, и не прости́лся, или́ язы́ка от слове́с пра́здных не удержа́л еси́, или́ сва́дил кого́ с ки́м, или́ позави́дел кому́, и не прии́м о то́м покая́ния, не приступа́й ко Святы́ни: не́сть бо возмо́жно недосто́йному и зре́ти, не то́кмо приступи́ти. Не бу́ди, я́коже Иу́да, и́же недосто́ин сы́й причасти́вся, в неисце́льный неду́г впаде́, и му́це ве́чней пови́нен бы́сть. Но подви́гнемся, ве́рнии, доброде́тельно, очи́стившеся посто́м, и моли́твами, и ми́лостынею, да прие́мше досто́йне Пречи́стых Та́ин, сподо́бимся одесну́ю престо́ла Бо́жия предстоя́ти, и зде́ ми́лость Бо́жию получи́ти, и Воскресе́ния Его́ ра́достно дости́гнути, сла́вяще Его́ со Отце́м и с Пресвяты́м Ду́хом, ны́не и при́сно и во́ веки веко́м, ами́нь.